توهان

في اول رمضان قلت هبعد بقي عن الراب و اخد اجازه ..

لكن علي نص رمضان لقيت نفسي عامل اغاني اكتر من اللي كنت عاملها قبل رمضان مش فاهم ازاي ...رغم ان الحياه كلها نوم و انترنت و خلافه

عملت التجربه الاولي .. و لقيت ردود افعال كويسه اوي ناحية الاغنيه دي عشان الشعب المصري مرهف الحس كلو بيحب الرومانسيه و اكيد اغنيه راب رومانسي يبقي شكلها جديد عليهم .. و بعدها رحت خابط اغنيه ايام زمان مع بنت من فلسطين و مع رابر من الاسماعيليه صحبي اسمو جيمي .. و لقيت ردود فعل كويسه برضه قلت لأ الواحد برضه لسه فيه الرمق .. لكن لما جيت بقي رحت عامل اغنيه انطباع البلاهه كنت متوقع اني هخسر جمهوري من البنات .. ده طبعا علي اساس ان انا ليا جمهور اساسا ههههه المهم.. لقيت الاغنيه عجبت البنات رغم اني مشردهم فيها .. و جيت بقي بعدها رحت رازع اغنيه الاخطبوط اللي انا تقريبا احتمال اتشد فيها لاني متكلم فيها بغباء و اللي بيسمعني عارف اني غاوي سياسه و ده السبب اللي هيخيلني ابطل راب بعد اللي هيتعمل فيا ههههه

اشوفكو بعد ما اصحي

ايه اللى بيحصل جوه بنطلونى دا؟!

مرة اخرى فى نادى الشمس.. على الحمام الأولمبيك

حاسس بتنميل فوق كعبى بشوية
مش مهم عادى رجلى منملة من القاعدة
التنميل بيطلع حبة حبة.. فى ايه خيرحاجه بتشوك كده
وصلت الى ركبى مابدهاش لازم اهرش
يانهار مش فايت
ايه المكبب اللى تحت ايدى دا؟!
جالى هلع.. بسرعه نفضت البنطلون
اعععععع ايه اللى وقع من البنطلون دا
دا كائن حى غريب جدااااا
كان جوة بنطلونى بيعمل ايييييييه؟!
كان لونة بيج ولية رجلين طخينة وجناحين
ياترى انا سليم.. عينى مش مزغللة ولا حاسس بدوخه
اه صح يبقى انا سليم باينبس ايه دا يا جدعااااان
عاوز اعرف.. واشمعنى بنطلونى انا بذات؟!

الشمس وهليوبليس

النهاردة روحت نادى الشمس اتفرج على ماتش فولى (كرة طايرة) تصفيات دورى الأندية تحت 17 سنة.. وطبعا هتسألونى و انت بتحب الفولى؟ هقولكم ان انا اصلا مش بحب الرياضة بس هى الظروف هى اللى بتخلينى بحب لعبة معينة.. عاوز اقولكوا انى بحب نادى الشمس جداا لانه اول نادى اروحه وانا صغير يعنى وانا عندى اربع سنين ولما كبرت لقيت صحابى بيلعبوا جودو وبقيت اروح اتفرج ولما كبرت اكتر فى ثانوى لحد الكلية كانوا صحابى بيلعبوا بوكس وطبعا لازم اروح اشجعهم ولما اتخرجت وكملت دراسات عليا اتعرفت على واحد بس المرادى مش لعيب المرادى مدرب فولى.. المدرب دا هو اقرب انسان الى قلبى دلوقتى وبحبه وبحترمه جداا.. وعلى فكرة اسمه على اسمى (شريف).. المهم عاوز اقولكوا ان فى كل مرة كنت بعشق اللعبة وبشجع من قلبى بجد.. والحمد لله غلبنا كالعادة (3-1).. وبعد الماتش روحنا احتفالنا انا والكوتش شريف وعزمنى على بيتزا وبعديها روحنا على المالكى نحلى وطلبت رز بلبن بالايس كريم وكان قوى جدااا.. بصراحة اتظبظ اليوم دا.. بس لما رجعت فى حاجه حصلت نكدت عليا.. بس مش هقولكوا عليها فى المدونة دى.. احتمال يبقالها مدونة تانية.. ماهى المدونات ببلاش بقى

ضيوف من اسكندرية

النهاردة جم قرايبنا من اسكندرية كزيارة رمضانية.. هم قرايب ماما لان قرايب ماما كلهم فى اسكندرية -الفرع بتاع جدى- اد ايه بحس برمضان لما يبقى فيه صلة رحم واشوف قرايبنا وكده وحاجات حلوة كده.. ماتتخيلوش انا فرحت بيهم اد ايه.. بحبهم لانهم جدعان اوى وطيبين وحبوبين وعندهم لكل كلمة حدوته وتحس بعشرة غريبة وانت معاهم عكس اهلنا فى القاهرة رغم المسافة اللى بنا.. بصراحه انا ببقى قاعد معاهم مستمتع خصوصا بلغوتهم الاسكندرنية.. وانا اصلا من صغرى بحب اسكندرية جداااا وليها مكان فى قلبى خاص.. ودلوقتى انا بحنلها ونفسي اعيش فيها على طول.. قاعدنا نهزر ونتكلم كتير وباتوا عندنا وفطروا عندنا ومشيوا بعد الفطار.. كنت نفسي اروح معاهم بس للاسف بقى.. لكن فى اقرب فرصة ان شاء الله لازم اروح

كوستا ... موكا

بعد الفطار لاقينا نفسنا هنام ومش قادرين قولنا نروح على كوستا طبعا انا مش كييف قهوة انا بحب الكابيتشينو والنيسكافية اكتر حاجة.. المهم مسكت المنيو لاقيت الصراحه انواع عجيبة.. كنت مرة زمان روحت كوستا وطلبت حاجه اسمها اكسبريسوو.. بعيد عنكو اتفاجئ بان الراجل جايبلى حبة قهوة سودا فى كوباية صغيييييييييرة انا حتى افتكرت في كمالة ليها بس عرفت اخير انه هو دا طلبى -بس بصراحه كانت جامدة ومانيمتنيش طول الليل-.. المهم انا المرادى قولتلهم انا عاوز حاجة تكون كبيرة وفيها لبن وكده.. فقالولى خود مـوكــا قولتلهم انتوا واثقين فى الموكا دى قولولى اه قولتلهم كبيرة قالى جرب بس قولتلهم توكلت على الله.. بعد الشوية الطلبات جت وابص الاقى حلة صغيرة كده بتتحط قدامى.. شيل يابنى بلاش فضايح.. بالهنا والشفا يافندم.. اه طيب عديكوا بقى على التريقة.. دلوقتى بس عرفت ليه الطالينا بهايم -بس على فكرة كوستا دا اول ماتعمل كان فى بريطانيا بس على ايد 3 اخوات ايطاليين ليبدعوا فى تقدين القهوة-.. هو كان فنجان كده بودنين اد سلطانية الشوربة من فوق الوش طبقة استريم كريمة ومرشوش عليها شيكولاته شكلها كان حلو بس كبيرة اوى.. المهم حان الوقت الغطس وقررت ان اغطس.. طبعا طلعلى اشنبة ودقون وحاجات تانية هقولكوا عليها بعدين
.......
بس برغم من دا اتضحلى ان موكا تستحق التجربة
بس ماتطلبوش لارج

نوم و مشاريع

نوووم

بنام كتير اوي

عملت ييجي 7 اغاني راب جداد

بصلي الفجر يوميا و انام اصحي الحق الظهر و انام تاني اصحي العصر اصلي و انام تالت و اصحي المغرب افطر و انزل اصلي و اعد عالانترنت و بعدها اروح اصلي التراويح و اجي يا اما اخرج يا ما اعد االف اغاني جديده

مخرجتش من البيت غير مره واحده نزلت فيها الكليه و يا رتني ما نزلت بس كان لازم اروح تجمع فرقة المسرح عشان مشرف النشاط لازم يعمل اجتماع مغلق لافراد الكاست لاختيار مخرج السنه دي و يوشف مين هيشتغل و مين هيحلق لنا و هكذا

المهم برضه منزلتش تاني يوم كما هو متوقع و مقضي الحياه نوم

المشروع الجديد بقي هو انتاج البوم راب بس بلون مختلف

اللي حصل تحديدا ان صديقي الملحن هيثم محفوظ عضو فرقة صبا الي بتعمل حفلات في ساقية الصاوي اقترح عليا الفكره و عجبتني

بصراحه اوي .. و هيبقي شكل مميز ولون تقريبا متعملش قبل كده اساسا

المشروع التاني بقي هو انتاج نشيد اسلامي لاني الفكره دي في دماغي من زمان و لما نفذتها الهارد اتحرق .. ما علينا بس عاوز انفذها تاني و عارف انو موضوع متعب عشان شغل المكساج والهارموني و الحاجات دي عاوزه وقت و معروف طبعا اني كالعاده شغال لوحدي في الحياه يعني انا اللي هشيل الليله كلها برضو مفيش فايده

هو بداية من العشر الاواخر طبعا هقفل موبايلي اساسا عشان اتفرغ لختم القرءان و طبعا انشغالي عن المدونة دي سببها عجيب جدا .. هو اني كنت ناسي اصلا ان فيه مدونة !!

فطار فى ستى استار

تررررن

H: الو ياحبى

انا: ايه يا اتش ازيك عامل ايه؟

H: هنفطر مع بعض بكرة فى دار الدفاع الجوى

انا: ايشطه

H: انا ومحمد ياسين ومحمود سكران وهشام وهيثم وسماح وعلا ونادية ووفاء ورشا

انا: ايشطه جدا مين هيثم دا

H: واحد كده

انا: اوكى.. هتفوت عليا؟

H: انا وسماح

انا: طيب مستنيكوا.. سلام

H: سلام

واحنا فى الطريق.. الخطة اتغيرت بقت سيتى استار بدل دار الدفاع.. اوبااا مابلاش فى رمضان سيتى استار ياجماعه.. لالا شغالة شغالة.. طيب -مانا معزوم بقى-.. روحنا سيتى استار لاقيت انها يعمها الاجواء الرماضنية المتحرره الى حد ما.. طلعنا على الزويدك على دار القمر لاقيناهم هناك قدمهم علب رانى وعصاير ومانجه وماية وعلبة طرشي.. افتكرتهم فطروا بس لما قربت لاقيت كل حاجه مقفوله الحمدلله لان كان فاضل ساعتين على الفطار.. قعدت فى مكانى وهم راحوا يطلبوا الاكل.. المدفع ضرب والاذان اذن وانا بتمنى وانا باكل اول بلحة انه يكون اول فطار ليا النهارده من اللى انا شوفته -وانا قاعد فى مكانى والله- من معاكسات والحاجات اللى بتجيلى من البنات اللى حولية على الموبايل.. والبلح دا كانت سماح جايبه اتنين كيلو بلح معها طبعا كل واحد مننا اخد بلح اول حاجه واتبقى اتنين كيلو بلح معاها.. فهشام الصراحة اخد علبة البلح ولف بيها على الدور والكل أخد حتى وهو بيوزع دخل على اتنين مسحيين قالهم اتفضلوا قالوا لا فى اولى مننا قالهم والله لانتوا واخدين.. الحمد لله عرف يتخلص من جريمة سماح.. أكلت جامد اوى بعد كده عشان كنت جعان فعلا.. وكانت اللمه حلوة موووت وكنت مبسوط.. رغم انه فاتنا التراويح.. روحنا عالساعة 8 ونص كده -ودا كان غير المخطط خالص.. عشان انتو عارفين التخطيط قبل الفطار يختلف تماما عن بعده- انا عن نفسي كان كابس عليا النوم بشكل عجيب.. اصلى بقالى يومين مانمتش وكنت الصبح فى انترفيو مع رئيس مجلس الادارة الساعه 10 الصبح يعنى قايم من 8.. المهم بقى مش عايز اقولكوا روحت عالساعه 9 ونص وانا عاوز احضن السرير وحضنته فعلا اول ماشوفته.. وماقومتش الا واختى بتصاحينى عشان اتسحر
ليه هى الساعة كام؟!

زيارة الى أجواء مدرسية

النهارده روحت لزيارة احدى الصديقات (عبير) فى عبير بعد الفطار -كانت عامله جو رمضانى هايل بصراحه فى البيت- كانت مديانى الكيسة بتاعتها اعملها الويندوز وروحت عشان اديلها الكيسة.. اول ماوصلت فتحلى بيدو (احمد) ابنها الكبير عنده 10 سنين.. هييييه عمو شريف صلحت الكمبيوتر قولتله اه.. قالى هى الجيمز اتمسحت ولا لاء قولتله لاء.. قالى هتلعبنى الدوده يعنى قولتله اه قالى بس انت جايبه على اخر يوم بكرة المدرسة وماما مش هترضى تخلينا نلعب.. دخلت وقعدت عبير جت واتقدملى ام على اخد اول معلقه.. ايه دا ياعبير دا ام على ولا سيريلاك بتاع بلال (ابنها الصغير) 9 شهور تقريبا.. عاوز اقولكوا ان معقد عبير فى أكلها.. وطبعا اتهزقت وقالتلى وحيات امى مانا عملالك حاجه تانى ياشريف.. المهم لاقيت بيدو عمال يجيب كرسات وجلاد واقلام وفارش فى الارض.. انا المنظر دا فكرنى بايام المدرسة -كانت احلى ايام-.. وبعد شوية سألت عن معشوقتى الصغيرة توته (رنيم) 4 سنين -مش عارف لغاية دلوقتى علاقة توته برنيم-.. بس انا بحب البنت دى جدا وبنقعد نتكلم بالاربع ساعات مع بعض فى موضوعات جاده وحوارات ساخنه.. توته بقى دى بسم الله ماشاء عليها عاوز اقولكوا انها بنت من الجيل الجديد اللى الواحد يخاف منه ولازم يستعدله من دلوقتى.. سألت عليها عبير اومال فين توته قالتلى بتعيط جوه عشان بيدو رايح المدرسة بكرة وهى لسه يوم التلات.. شوية ولاقيتها جاية بتعيط وتقولى عمو شريف عجبك كده مامى مش مهتمية بيا والدموع نازله من عنيها بتفر.. قولتلها ليه احكيلى طيب تعالى ايه اللى حصل قالتلى عماله تقول لبيدو حضر شنطتك واحفظ القرآن وكل سندوتشات وعماله تذاكرله وسايبانى خالص هو انا مش بنتها الصغيرة يعنى ولا ايه.. وكمان -بتنهيده ساخنه- انا واقفه معاها طول اليوم وبسمع كلامها فى كل حاجه وهو عمال يتشاقة ومش بيسمع الكلام.. قولت لعبير صحيح اللى توته بتقوله عليكى دا.. -طبعا عبير عماله تضحك جامد وانا بتكلم جد بقى وواخد كلامها كانه خيانه عظمى- قالتلى الهانم عندها مدرسة لسه يوم التلات لكن بيدو عنده بكره.. قولتلها طيب ياتوته مانتى لسه على المدرسه يومين بعدين انتى عارفه ان الواد بيدو بليد مابيحفظش وانتى شاطرة وحافظة كل القرآن اللى عليكى.. بعدين ياتوته الشاطر هو اللى مابيخدش تعليمات من حد ولا بيخلى حد يذاكر له.. لكن البليد بس هو اللى لازم يتزعقله وحد يذاكرله وكده صح ولا لاء.. قالتلى ايوة.. قولتلها انتى حفظتى القران بتاعك.. قالتلى اه قولتلها طب سمعى راحت سمعتلى قل يا ايها الكافرون قولتلها شاطرة ياتوته شوفتى بقى ازاى انتى شاطرة.. قالتلى اه راحت عبير قالتلهم يلا بقى عالنوم كله ينام كانت.. راحت توته قالتلى شوفت انا قولتلك قولتلها ايه؟ قالتلى عايزة تنايمنى من غير عشا.. طبعا فى دى ماقدرتش امسك نفسي وضحكت عليها انا وعبير..
ACK TO SCHOO

جالى اس ام اس

رمضان كريم.. حتى فى الاس ام اس.. السنادى فوجئت بكمية الاس ام اس اللى جاتلى.. فرحتنى جداا.. وحسستنى أد ايه فى ناس كتيرة بيحبونى وفاكرينى وعاوزين يهنونى برمضان.. فى تانى يوم رمضان وصلت الاس ام اس بتاعة رمضان عندى الى 57 اس ام اس.. طبعا دا غير الناس اللى حبوا يكلمونى بنفسهم.. فعلا رمضان فرصة جميلة عشان نفتكر بعض.. ونعرف فيها رصيدك من الاشخاص اللى انت ممكن تكون على بالهم فى مناسبة من المناسبات -زى رمضان كدا-.. انا كمان بعت حوالى 20 اس ام اس.. وطبعا اللى وصل منهم فى علم الغيب.. مانتوا عارفين شبكة رمضان.. طب انا كنت بتصل بواحد صحبي ولاقيته مشغول فقولت اتصل بواحد تانى لاقيت اللى مشغول رد عليا ورقم اللى انا طلبته هو اللى ظاهر.. فهمتوا حاجه؟! يلا مش مهم.. متشكر لكل اللى سأل عنى.. حتى لو باس ام اس..

مجرد فكرة

كل سنة فى رمضان كنت بختم القرآن مرة بالعافية مش عارف ليه البطئ اللى انا فيه.. وبشوف ناس تختمه اربع خمس مرات وكنت مستغرب اوى هم بيقروا وخلاص ولا بيفهموا اللى بيقروا من القران.. يعنى مثلا كنت بختمه مره بس بطلع وانا معايا معان مفيده وببقى حافظ ايات كتيرة من القرآن.. السنادى فكرت فى فكرة جديدة وهى انى اختم القران بسرعه وانى اقرا بعد كل صلاة جزء وفعلا اليوم الاول مر عليا بنجاح وخلصت خمس أجزاء والحمد لله.. مش عارف ليه حاسس ان القران سهل عليا اوى السنادى -غير المعتاد- مع انى كنت بقالى كتير مقرأتش فيه.. بتهيئلى انا عارف السبب وهوانى لاقيت شيئ كان ضايع من وانا مرتاح نفسيا الايام دى والدنيا لذيذه وفرحان بكل حاجه حولية والحمد لله.. المهم عشان بدأت اخرج عن الموضوع.. الفكرة بقى هى انى قررت اختم القران فى الاسبوع الاول من رمضان (ان شاء الله) بعدين اخد 10 ايام او اكتر على حسب فى قرأت احدى كتب التفاسير القرآنية.. انا عندى تفسير القرطبى ودا استحاله هقربله لانه حوالى تقريبا 6000 صفحة.. بس فى تفسير صغير كده عجبنى اسمه ابو جعفر الطبرى هبتدى اقرا فيه (ان شاء الله).. وكنت مشترى عندى تلات كتب للقران باللانجلش.. هبتدى امزز فيهم لغاية العيد او بعده.. يعنى دى كانت خطتى بالنسبة للقرآن السنادى مش عارف انتوا رأيكوا ايه فيها...

شنطة رمضان

كل سنة وانتوا طيبين.. فكرة شنطة رمضان دى حقيقى فكرة جامدة جدا.. مع ان فى ناس رأيها ان الفلوس احسن بس انا رأيي غير كده.. لما تروح السوبر ماركت وتبتدى تنقى اكل من اللى انت متعود تاكله وتجمع كذا شنطة وتدور على ناس غلابة وتديلهم الشنطة بتحس اد ايه بسعادة.. الناس الغلابة كتير على فكرة الموضوع مش محتاج تدوير.. انا حظى ان بابا وماما بيشتغلوا فى مستشفيتين بيعالجوا المرض الوحش -اللى مش عاوز اقول اسمه- ربنا يبعدوا عننا كلنا.. وماتتخيلوش اد ايه الناس الغلابة هناك يمكن عشان هم المستشفيتين الوحدين فى مصر المتخصصين فى الموضوع دا.. فعلا فىناس كتير كانوا هناك يستحقوا شنطة رمضان هم مش فقرا بس لاء هم كمان مرضى باصعب مرض ممكن يصيب بيه الانسان.. ماتتصوروش مدى سعادتهم لما يلاقوا واحد مايعرفهمش وبيطبط عليهم ويقولهم كل سنة وانتوا طيبين.. ولما يبتدى وابل الدعوات اللى تشرح القلب.. ولما تسيبهم وانت فرحان وبتدور على ناس تانية.. وتلاقيهم وتسعدهم.. ولما تقعد تفكر بعد مشوار الخير دا انت أسعدت كام واحطة بشنطتك البسيطه دى - واللى انا عارف انها ماتكافيش 3 ايام من رمضان بالكتير بالنسبالهم خصوصا لو عددهم كبير- بس حقيقى الاحساس تحفه.. ربنا يتقبل مننا.. وربنا ما يقطعلنا عادة فى الخير ابدا...

مرحب شهر الصوم.. مرحب

رمضان قرب خلاص.. وانا بحاول استعدله لغاية دلوقتى وعمال اهيئ نفسي عشان يبقى رمضان مختلف عن الـ 23 رمضان اللى فاتوا عايز أستقبله براحه نفسيه واخلص فيه لطاعة ربنا عشان الواحد بجد زودها اوى السنادى وساب الحبل على الغارب.. انا وصحبى مودى مشتركين فى المدونه دى وهو من اعز اصدقائى وبحبه اوى وبحس انه قريب منى اوى.. كنا متفقين انا وهو على اننا نبدأ نكتب فيها من بداية شهر رمضان.. بس اللى حصل اننا مش مستحملين نشوفها فاضية كده وقاعدين نتفرج عليها.. وقولنا نكتب شوية ونعرفكو ان المدونه ليها صاحب يعنى لحسن تفتكرو انها مهجورة ولا حاجه.. المهم انا عاوز اقولكوا انا ان شاء الله هتكلم فى مواضيع كتيرة اوى وعاوز مشارتكم معانا.. واستنونا بقى فى رمضان عشان الشغل الطحن بقى.. ربنا يجعله اجمل رمضان فى حياتنا.. واسيبكو مع اغنية هاتي فانوسك ياختي يا إحسان أه يا ننوسك في ليالي رمضان ماما تبوسك وباباكي كمان وانا ممكن أبوسك كمان ماعنديش مانع.. لسه رمضان مجاش بقى
:D

دوس هنا لتنزيل الأغنية

غنوا معانا

هو اينعم رمضان لسه مدخلش بس نعمل ايه بقي الواحد ايده بتاكلو و علي طول طالبه معايا اكتب و ارغي بفايده و من غير فايده

بس المدونه دي معموله مخصوص عشان شهر رمضان الجاي و الواحد اهو بيمزمز و يسلي صيامو بشويه كلام فارغ لا يودي ولا يجيب و ادينا بندردش سوا


طبعا الواحد بدأ يعود نفسو من دلوقت علي لم لسانه بقي شويه و تنضيف كلامنا من الالفاظ المنيله اللي بقت لازمه في كلامي .. عشان الواحد يخش رمضان و هو محترم مره في حياته


بس والله صمت امبارح نص شعبان و مضبط حالي اهو .. بس مش ناوي اسيب دقني زي رمضان اللي فات عشان الحر و عشان شويه فلسفه كده هبقي اشرحهالكو بعدين ..


و اسيبكو بقي مع اغنيه رمضان جانا


واضغط هنا لتنزيل رمضان جانا